కాడావెరిక్ ప్రమాణ స్వీకారం – వైద్య విద్యార్థుల్లో మానవతా విలువల వికాసం
భద్రాద్రి కొత్తగూడెం, మహానది న్యూస్, నవంబర్ 06:
కొత్తగూడెం ప్రభుత్వ వైద్య కళాశాలలో కొత్త బ్యాచ్ విద్యార్థుల కోసం కాడావెరిక్ ప్రమాణ స్వీకార కార్యక్రమం ఘనంగా నిర్వహించబడింది. వైద్య విద్యా ప్రయాణంలో ఈ కార్యక్రమం ఒక ముఖ్యమైన మైలురాయిగా నిలిచింది.
మానవ దేహం పట్ల గౌరవం, బాధ్యత, వైద్య నైతికతల పట్ల అవగాహన పెంపొందించడంలో ఈ ప్రమాణ స్వీకారం కీలక పాత్ర పోషిస్తుందని కళాశాల ప్రిన్సిపల్ డాక్టర్ శ్రీహరిరావు వివరించారు. విద్యార్థులు సమిష్టిగా ప్రమాణం స్వీకరించి, శరీరదాతల దేహాలను గౌరవం, గాంభీర్యం, సమగ్రతతో చూడాలని ప్రతిజ్ఞ చేశారు.
శరీరదాతల నిస్వార్థ సేవలను స్మరించుకుంటూ విద్యార్థులు నివాళులు అర్పించారు. ఉప ప్రిన్సిపల్ మాట్లాడుతూ, శరీర దానం మానవతా చిహ్నమని, వైద్య విద్యా అభివృద్ధికి మూలాధారమని పేర్కొన్నారు.
దేహదాతల కుటుంబాలకు కళాశాల తరఫున కృతజ్ఞతలు తెలుపుతూ, ప్రజల్లో శరీరదానం పట్ల చైతన్యం పెంచేందుకు కళాశాల కృషి కొనసాగిస్తుందని చెప్పారు.
శరీర దానం కార్యక్రమానికి నిరంతర మద్దతు అందిస్తున్న ఝాన్సిరాణి కంటి మరియు శరీర దానం ట్రస్టు సేవలను ప్రశంసించారు. వారి అవగాహన కార్యక్రమాల ఫలితంగా కళాశాలకు శరీర దానాలు పెరిగి, విద్యార్థుల ప్రాయోగిక విద్యాభ్యాసానికి తోడ్పడుతున్నాయని తెలిపారు.
కార్యక్రమంలో అనాటమీ విభాగాధిపతి డాక్టర్ ప్రసన్న, అధ్యాపకులు, సిబ్బంది, విద్యార్థులు పాల్గొన్నారు.
